රැසියාවෙන් වෛද්‍ය සමන් වීරසිංහට “ජාත්‍යන්තර සහයෝගිතා සම්මාන පදක්කමක් ”

0
252

 
ජාත්‍යන්තර සහයෝගීතාව සහ සම්බන්ධීකරණය වෙනුවෙන් රුසියානු සමූහාණ්ඩුවේ විදේශ කටයුතු අමාත්‍යාංශයෙන් පිදෙන “ජාත්‍යන්තර සහයෝගිතා සම්මානය” අග්‍රාමාත්‍ය උපදේශක සහ රුසියාවේ හිටපු ශ්‍රී ලංකා තානාපති වෛද්‍ය සමන් වීරසිංහ වෙත මොස්කව් නුවර දී පසුගියදා ප්‍රදානය කෙරිණි.

 විදේශීය රාජ්‍ය සමග ද්වීපාර්ශික සම්බන්ධතා වර්ධනය කරමින් රාජ්‍ය අතර සහයෝගිතාවය වර්ධනය කිරීමට එරට  විදේශ අමාත්‍යංශය හා ක්‍රියාකාරීව සම්බන්ධවන රුසියානු පුරවැසියන් හා විදේශීය පුරවැසියන් වෙනුවෙන් රුසියානු සමූහාණ්ඩුව මෙම සුවිශේෂී සම්මානය ප්‍රදානය කරයි.
“රුසියානු සමූහාන්ඩුවේ වීරයා” සම්මානයෙන් පිදුම් ලද අභ්‍යාවකාශගාමී වැලේරී තකාරෙව් ද වෛද්‍ය සමන් වීරසිංහ මහතා සමඟ මෙම සම්මානයෙන් පිදුම් ලැබීම විශේෂත්වයකි.

ශ්‍රී ලාංකිකයකු මේ සම්මානයෙන් පිදුම් ලැබූ පළමු අවස්ථාව මෙයයි. මින් පෙර ස්ලෝවේනියාව, ඉන්දියාව, ප්‍රංශය, බල්ගේරියාව රටවල තෝරාගත් පුරවැසියන් සඳහා මේ සම්මානය ප්‍රදානය කර තිබේ.
 
රුසියානු විදේශ කටයුතු අමාත්‍යාංශය වෙනුවෙන් රුසියානු සමූහාණ්ඩුවේ විදේශ කටයුතු අමාත්‍යාංශ සම්මේලනයේ පාර්ලිමේන්තු සහ මහජන සංගම් විෂය සබඳතා පිළිබඳ දෙපාර්තමේන්තුවේ අධ්‍යක්ෂ සෙමෝන් ග්‍රිගෝරියෙව් විසින් වෛද්‍ය සමන් වීරසිංහට මේ සුවිශේෂී සම්මාන පදක්කම පළඳවා තිබේ.
 
රුසියාව සහ ශ්‍රී ලංකාව අතර මිත්‍ර සබඳතා වර්ධනය කිරීම සඳහා වෛද්‍ය සමන් වීරසිංහ මහතා වසර ගණනාවක් තිස්සේ තුළ ඉටු කළ සුවිශේෂ කාර්යභාරය ඇගයීම ද මෙම සම්මාන ප්‍රදානයට සමඟාමීව සිදුවිය.
 
වෛද්‍ය සමන් වීරසිංහ මහතා රුසියාවේ ශ්‍රී ලංකා තානාපති ලෙස (2015-2018) රුසියානු-ශ්‍රී ලංකා ද්විපාර්ශවික සබඳතා ඉහළ දැමීමට වටිනා මෙහෙවරක් ඉටු කළ අතර අග්‍රාමාත්‍ය උපදේශක තනතුරට අමතරව, ශ්‍රී ලංකා – රුසියානු මිත්‍රත්ව සංගමයේ ප්‍රධාන  ලේකම් ලෙස ද කැලණිය රජ මහා විහාරස්ථානයේ දායක සභාවේ සභාපති ලෙස ද දෑ හිත කාමී මෙහෙවරක නිරත වී සිටියි.
 
මොස්කව් නුවර රුසියානු සමූහාණ්ඩුවේ විදේශ අමාත්‍යාංශයේ පැවති උත්සව අවස්ථාවට එරට විදේශ කටයුතු අමාත්‍යාංශයේ අධ්‍යක්ෂ සෙමෝන් ග්‍රිගෝරියෙව් මහතා, රුසියාවේ ශ්‍රී ලංකා තානාපතිනි මහාචාර්ය ජනිතා අබේවික්‍රම සහ රුසියානු විදේශ අමාත්‍යාංශයේ ඉහළ නිලධාරින්, තානාපතිවරුන් ඇතුළු සම්භාවනීය පිරිසක් එක්ව සිටියහ.

LEAVE A REPLY

Please enter your comment!
Please enter your name here